傷到要學行學跑學跳 艾里奧浴火方能重生
「浴火方能重生」傑志守將艾里奧（Helio）雖然不諳中文，但仍深明此理。這名近年頻頻代表香港隊出戰國際賽的巴西裔後衞，不幸在去年為港隊上陣時重傷，導致他在今屆港超聯差不多缺陣了整個上半季，然而他未曾因此感氣餒，揚言「傷患使我變得更強！」
艾里奧來自巴西聖保羅州，2008年寂寂無聞的他來到香港，為公民征戰6年後轉投傑志，自此成為「藍鳥」後防中流砥柱，為傑志贏盡錦標之餘，更為球隊出戰亞冠盃。國際賽場上，這名「森巴」援將在2016年入籍香港，為港征戰世界盃外圍賽等多項賽事。可是，去年3月為港隊出戰亞洲盃外圍賽對北韓時，一次跳頂落地不幸傷及十字韌帶，這次傷患足足花費8個月時間來康復。
「傷患，令我成為更強嘅人」
談到感受，艾里奧坦言康復過程十分艱辛：「呢次傷患康復時間非常長，康復初期永遠都係唔容易，既要面對傷痛同手術，做物理治療時仲要行得非常慢，肌肉好虛弱，呢啲都曾經令我好沮喪。我要重新學習點樣行路、起跳同跑步，全部都係一個新開始。」要度過難關，心中一定要有堅毅的意志，滿懷希望的「Helio」表示，克服逆境能使人變得更強：「我唔認為傷患能夠阻止我繼續踢波，反而能夠令我成為更強嘅人，因為呢個正正係一個可以挑戰自己嘅機會，測試自己有幾強、意志有幾堅定。」
一向重視家庭的艾里奧，坦言每次傷患都會使家人感到擔憂：「我大女總係好驚我整傷，上次為傑志作客馬來西亞，我喺一次碰撞之後跌低，仲趴喺地上一段時間。我太太之後同我講番，我大女對住電視機喊，哈哈！但我知道佢係因為緊張我先會咁，有佢哋支持先有依家嘅我，多謝我嘅家人。」
要克服難關，戰友的支持是不可缺少，艾里奧感謝球隊「第十二人」的支持：「球迷喺我受傷嗰陣幫到我好多，有啲仲Send訊息鼓勵我，甚至有球迷嚟醫院同我屋企探我，真係非常窩心。即使傷患曾令我感到好沮喪，但係球迷嘅行為確實鼓勵到我。」
Helio窩心同粉絲零距離
香港球壇之中，艾里奧算是與球迷關係非常密切的球員之一。粉絲賽後在球場外等待球員，「Helio」往往會主動握手答謝。他向記者分享了一段印象深刻的「球迷奇遇記」：「記得2016至17年球季，傑志最後一場要贏到東方龍獅先可以奪冠，最終我哋贏4比1。球證吹雞一刻，所有球迷衝晒落嚟球場，真係太瘋狂！我知道佢哋咁做係唔啱，不過對我嚟講真係太深刻啦。」
最後，記者好奇問起他來港征戰多年，眾多中堅拍檔之中，哪一位與他最合拍，他笑言這條問題非常難答：「我曾經喺傑志同過好多位中堅球員合作，列斯奧、金奉珍等。不過始終同我最有默契嘅係法圖斯，因為我哋喺球會合作過6年，之後又喺香港隊做拍檔，所以佢同我最合拍。」
圖/文：黃雋謙、何彥霆