政情：同何俊賢鍊車 劉國勳玩攬炒

其實佢哋只係出席傳媒聚會，仲分兩隊以賽車遊戲作賽啫！雖然只係玩電競，但設備似足真實揸車，有齊軚盤同腳踏，而且遊戲以香港作背景，兩人猶如置身龍和道鍊車一樣。

實力懸殊 劉連腳踏都未分清

不過，兩個人當中，只有高佬賢有車牌，結果亦由高佬賢大熱勝出，而且以一分三十九秒勝出，比劉國勳快近一分半鐘，實力懸殊。早早勝出嘅高佬賢都忍唔住口，為劉國勳做導航，議員葛珮帆仲要提水邊個腳踏先係煞車。

高佬賢喺賽後就話有難度，尤其係畀劉國勳撞咗兩次，阻住前進，但劉國勳笑住話攬炒嘛！劉國勳仲透露，自己唔習慣以司機第一身視覺去玩賽車，轉頭見佢埋首玩番手機遊戲就輕易做咗MVP，睇嚟真係玩唔慣賽車啫！