政情：泰國公主訪天文台 變身天氣小姐
平日報道天氣嘅「天氣小姐」就見得多，日前就有位皇室級嘅「天氣小姐」登場，佢就係泰國詩琳通公主喇！佢喺本月八日到訪香港天文台時，喺天文台電視錄影室粉墨登場做咗一節天氣節目，親身體驗電視天氣節目製作，最後泰國皇室仲將有關片段上載到互聯網，唔知公主事後睇番滿唔滿意自己嘅表現呢？
台長岑智明親自迎接
今次公主到訪，天文台台長岑智明都有親自迎接，帶公主參觀歷史室同天氣預測總部，唔單止睇咗天文台一百三十五年歷史，仲講解埋天文台嘅職能，例如二十四小時監測天氣情況、航空氣象服務等。岑仲話，對上一次有公主來訪天文台已經係一九八三年嘅事，當時係英國安妮公主到訪，事隔三十六年後再有公主駕到，對此深感榮幸咁話。