政府早前已提出修訂《逃犯條例》，希望處理埋台灣殺人案，兼堵塞法例漏洞。有關條例草案喺本月進行首讀及二讀時，反對修例嘅民主派議員已經猛提規程問題，誓要阻撓修例。面對嚟緊召開法案委員會，據悉民主派會盡可能阻撓修例，除咗例牌嘅拉布點算開會法定人數，仲吸取過去教訓，計劃延展其他政府法案，以爭取時間拉布。
政府以「先訂立，後審議」方式提出附屬法例，一般都會設有最後審議限期，如果有議員需要更多時間跟進，就需要喺大會提出延展議案，以延長法案審議期限，變相成為民主派的拉布彈藥。民主派日前喺內務委員會上，就不停舉手要求成立小組委員會，跟進十項政府法律公告，而十項法律公告限期就喺本周三（17日），由於有議員要求跟進，故內會主席就需要喺本周三提出延展議案，到時民主派就可以乘機發言。
此外，依家仲有十三個法案委員會已展開審議工作，若完成審議後再上番大會，民主派又可以增加拉布彈藥喇。有民主派中人就話，現階段會用盡方法阻撓法案，雖然唔知成效係點，但都會做咗先。仲有人提到話不停開小組委員會，務求可以令到立法會冇會議室同時間開《逃犯條例》嘅法案委員會添。不過，民主派玩到咁盡，真係唔怕被炮轟放生台灣殺人案疑犯？