申訴專員劉燕卿任期今日屆滿。將展開退休生活嘅佢，喺尋日一個電台節目回顧過去五年嘅工作，講到一直以來投訴者同被投訴嘅部門被視為對立兩方，申訴專員公署就好似仲裁法官，搞到經常被朋友取笑佢係包青天。佢認為，投訴者、政府部門或公營機構應該係「合作夥伴」，投訴者同部門並非壁壘分明，而係應該好似鏡咁反映部門行事方式係咪正確、有咩地方要改善等，又話用正面態度去看待投訴，有助社會建立良好行政制度。照佢咁講，香港有「投訴之都」之稱，都唔一定係壞事嚟嘅。
