政情：跨界開混凝土廠 潘桂桃：石屎有價勝珠寶
黃金鑽石當然矜貴過石屎，不過依家經濟時勢唔同，珠寶界個個都呻難做。香港金銀首飾工商總會副會長潘桂桃（Passy）做珠寶生意廿幾年，五年前因緣際會跨界做埋預拌混凝土生意，結果賺得和味過做珠寶，真係要嘆句「石屎有價」。
Passy話，初期投資位於廣東河源嘅混凝土廠時經歷過一段艱辛期，近年上晒軌道就愈做愈順手，主要係得益於內地經濟起飛，住宅樓宇及基建工程一個接一個咁起，對混凝土需求好大。相反珠寶生意受環球經濟不景、購買力下降衝擊，確係難做。
Passy又話，原來佢哋供應混凝土畀起住宅嘅地產商，起完樓後未必收晒錢，有時會揀埋樓，折算後唔夠先再加現金，所以依家佢已有好多內地物業揸手，有啲自用，有啲就待價而沽。
籲年輕人考慮北上發展
講起內地樓，佢話河源樓好抵買，面積大約一千呎未裝修嘅「毛坯房」只係賣四、五十萬人民幣，遲啲當地高鐵通車就更方便，所以香港年輕人不妨考慮北上發展咁話。