中環出更：流感麻疹夾擊 李本智話打預防針有益無害
香港流感肆虐，近日又受到麻疹嘅威脅，個案愈爆愈多。卓妮日前喺中環見到香港鐘表業總會永遠名譽會長孫秉樞同該會嘅財務及行政部副部長李本智，原來佢哋啱啱開完會。講起最近有關麻疹嘅新聞，李本智就話佢全家人都打咗麻疹針，認為打咗就百利而無一害喇。
李本智話小朋友係高危一族，所以基本上都打晒預防針，當中包括麻疹針，而佢亦喺今年初打咗麻疹針，自然安心啲。佢隔籬嘅孫秉樞亦都話佢年年都有打流感針，但麻疹針就冇打。問到香港以至外地都有爆發麻疹，驚唔驚呢，佢就話呢幾年都好少出外，不過都要小心啲，唔好去人多嘅地方，同要注意衞生。
轉頭又遇到香港中華廠商聯合會永遠名譽會長施榮懷，佢話佢全家都有打流感針。問到依家麻疹個案愈爆愈多，有冇打埋麻疹針，佢就話冇喇，不過舊年就打咗預防生蛇嘅疫苗。佢話，以佢嘅年齡層都唔知仲有冇抗體，若果要清楚嘅話，就要去醫院驗血先知，不過見到愈來愈多人感染，自己就會小心啲。佢又講起，其外傭到家前已做晒身體檢查同打預防針，若果麻疹爆發嘅情況好嚴重，佢都會考慮帶外傭去打麻疹針喎。
湯恩佳：做運動加強抵抗力
當日孔教學院院長湯恩佳同太太及女兒行街食飯，大家有講有笑，問到依家又爆流感又爆麻疹，有冇乜嘢預防措施，佢就話最緊要戴口罩。佢話，早兩年喺韓國坐飛機返港期間，就因為冇戴口罩，感染咗流感，搞到睇咗好多次醫生，要食好多藥先好番，患病期間好辛苦，所以必定要注重衞生，做多啲運動都會加強抵抗力。佢遲啲會去海南開會，佢話到時必定會戴埋口罩上機，以防受到感染。
卓妮