職場健康：除積水源頭 減春夏蚊叮
康仔與大強是戶外清潔工，他們今天被委派到郊野公園清潔。大強說：「嘩，康仔，做咩喺度挨身挨勢？皮膚痕定皮膚敏感啊？」康仔說：「唔好提啦，一到春天四周圍都係蚊，搞到我成身畀蚊針到紅晒。」
大強說：「香港地春夏多雨潮濕，係蚊活躍季節，我哋好容易被蚊叮。所以必須採取適當防蚊措施，從源頭出發，再對症下藥。」康仔說：「應該點做呀？」
蚊卵一周完成孵化
大強說：「首先，要了解蚊嘅生活習性，蚊係要經過四個階段蛻變，先可以由卵變為成蟲。蚊先產卵於水中，卵孵化為幼蟲並蛻變成蛹，最後變成蚊。平均只需大約七日就可以由卵變為成蟲。蚊卵在未孵化成蚊前會經過蚊卵、幼蟲及蚊蛹三個階段，都係喺水中進行。所以想杜絕蚊患，在於清除蚊卵及清除積水，消除一切源頭！」
留意儲水容器積水
康仔說：「講就易，有咩建議？」大強說：「既然知道水係蚊主要孳生地，咁最根本防蚊方法就係消除一切積水源頭。我哋要有效清除地面積水同埋落葉，仲要經常清理排水渠，以防淤塞。有機會儲水嘅容器，好似水桶、垃圾桶同儲水箱，都要有效咁遮好。用泥土將竹枝殘幹填封，每個星期更換花瓶內嘅水。至於停車場裏面，喺防撞輪胎亦要鑽幾個大窿疏水。喺無法接近或難以清除嘅積水源頭，可用蚊油或除害劑將蚊嘅幼蟲殺死。」康仔點頭：「清楚明白！」
職業安全健康局
www.oshc.org.hk