政情：一帶一路冇人理 嚇呆陳百里
立法會尋日開番大會，唔知係咪放咗兩個星期假嘅關係，啲議員似乎對啲議題都唔多關心，喺其中一條口頭質詢上仲要冇人追問，以極速八分鐘內搞掂，負責回應嘅商務及經濟發展局副局長陳百里仲呆晒咁添！
話說紡織及製衣界議員鍾國斌尋日喺會上問到有關政府喺一六年設立一帶一路辦公室嘅工作成效、人手編制同未來工作計劃。陳百里回應時話計劃今年年中會召開第二次一帶一路聯席會議，而且會籌備外訪同埋喺今年九月再搞一帶一路高峰論壇。
鍾國斌鬧冇乜議員在席
其實當時冇乜議員喺會議廳，而喺陳百里回應完後，鍾國斌就起身鬧，話唔知係咪自己條問題好無聊定冇用，仲反問主席唔知有冇見過呢個場面，質詢時間係議員都冇乜。佢仲話一帶一路係國家重要嘅政策，但喺香港議會竟然冇人跟進，所以佢都話自己冇跟進問題。
之後立法會主席梁君彥仲請局長發言，陳百里企起身就呆咗咁問「個跟進問題係？」鍾國斌就再講多次話自己冇跟進問題，梁君彥先話開始下一條口頭質詢。唔知梁君彥係咪都畀呢個場面嚇親呢？