政情：泛民驚甩轆下月「搶閘」提六四議案
立法會議員可以喺大會上提出無約束力嘅議案，過去泛民議員會喺每年六月四號之前，提出「平反六四」嘅議案，但近年受拉布同議程安排嘅影響，好多時六四議案都趕唔切喺六月四號之前提出。民主黨主席、立法會議員胡志偉就作出預告，佢會提出六四議案，預計最快可以喺下月三號喺大會進行辯論。早成兩個月提出，唔通泛民怕甩轆？
胡志偉接受查詢時就解釋，話因為唔少泛民議員抽籤失利次數都差唔多，再加上要等下一次抽籤嘅話，又會有好多變數，所以趁依家抽中咗就提出。佢仲話過往支聯會喺四月份開始都會有關於六四嘅活動，依家立法會提早辯論，都可以早啲等公眾關注。
今年議案嘅措詞同過往差唔多，係「本會呼籲：毋忘六四，平反八九民運。」至於到時議員會唔會有其他行動，胡志偉就話泛民暫時未有傾過。