政情：黃偉綸側側膊 啟德單軌車拖12年唔多覺
開講有話「一動不如一靜」，政府近年都係用呢個態度做事，實行以不變應萬變，但唔代表唔使被追數同炮轟。政府銳意將九龍東打造成第二個核心商業區，擬於啟德建架空單軌列車貫通，但拖足十二年都毫無寸進，發展局局長黃偉綸尋日終於承認依家冇推展時間表。呢個項目都玩咗兩輪諮詢、三次研究亦冇結果，唔通想側側膊拖到胎死腹中？
立法會九龍東議員柯創盛（柯仔）尋日喺立法會大會提口頭質詢，關注港鐵觀塘線載客量飽和，擔心將來興建單軌列車會難以負荷額外乘客量，問當局幾時先可以交到最終方案同向立法會攞撥款。黃偉綸回應時就講番成個計劃嘅前世今生，不認不認還需認，最後就話仲做緊詳細可行性研究，搞掂之後先籌劃項目未來路向，現階段未有準確嘅推展時間表，今年就唔可能o架喇！
認冇時間表 廢答辣㷫柯仔
柯仔聽到好火滾，一嚟就鬧黃偉綸答完等於冇答，喺度玩拖字訣，拖足十二年都冇作為，擔心將來計劃落實時會唔會唔能夠與時並進，更質問政府幾時先有時間表，可唔可以對市民有啲承諾。柯仔事後再批評政府面對問題時因循守舊、欠缺魄力同承擔，將再約見局方跟進兼要求喺發展事務委員會討論。
黃偉綸回應時話「分享」議員感受，但項目有好多技術挑戰，舉例建議單軌經跑道末端連接開源道，嗰度屬於舊區道路狹窄，設置架空列車或未能滿足消防條例，以及路經觀塘避風塘亦受保護海濱相關條例規管，且如要剔走有關避風塘會令全港避風塘面積不足，需要覓地重置等。佢又話起動九龍東辦事處喺區內試行緊唔同智能系統，可以更有效使用路面，反建議議員考慮單軌車駁港鐵係唔係可以做到分流？
技術挑戰炒冷飯 愈拖愈貴
計劃本來預計今年動工、二○二三年啟用，黃偉綸提嘅都係「老問題」，好似避風塘嘅跨海大橋，地區有共識起高啲畀大船入，唔係冇方法解決。相信最關鍵，係早年地區擔心票價唔高，人流不足，單軌收入唔夠支援營運，政府又唔知貼唔貼錢好。拖咗咁耐都計唔掂數以為唔提就唔使理，本來話用一百二十億元可以搞掂，十幾年乜都貴晒，再拖就只會愈來愈貴，到時政府係咪又有藉口話造價高、效益低唔做呢？