中環出更:保良局總部重建 陳細潔:發展 保育 要平衡

香港地少人多,要滿足社會需要就逃不開要將舊物清拆重建,而保良局總部重建在即,但最有歷史價值嘅中座大樓唔受影響,保良局顧問陳細潔就覺得發展同保育需要做到平衡喇!

保良局早前獲前副主席廖烈正太太廖湯慧靄同紀惠集團捐贈作重建位於銅鑼灣嘅保良局總部,日後嘅二級歷史建築物中座大樓將會有更多空間,可以開放畀市民共享。當日捐贈儀式非常熱鬧,保良局就有顧問陳小寶、總理湯振傑同廖偉芬等出席,而捐出善款嘅廖湯慧靄,其兒子廖偉麟及媳婦、廖湯慧靄嘅細佬湯文亮同姪女湯振玲等一齊到場。

陳細潔話發展同保育嘅關係就等同「手掌又係肉、手背又係肉」,保留歷史建築物重要,但又唔可以犧牲年輕人嘅發展空間,但佢就覺得要盡量保育,因為歷史唔能夠忘記,就好似收藏有紀念價值嘅物品,自己都唔捨得棄置一樣。

湯文亮話起樓應揀近郊

湯文亮就認為滿足住屋要求唔需要拆卸歷史建築物,因為要睇整個社區嘅承載力,而且有啲歷史建築物面積唔大,發展到嘅住宅單位唔多,回報並唔高,反而現時講求城市擴張,應該向近郊地方發展。

廖湯慧靄就大談同保良局嘅緣分,就係丈夫就職保良局當日發現懷有囡囡廖偉芬,所以一直希望佢加入保良局。廖偉芬就話自己都係承諾加入保良局後先知呢個秘密,證明媽媽畀咗足夠自由度,而自己聽到後都好感動,因為自己同爸爸關係好親密。

卓妮

第一手消息請下載on.cc東網iPhone/iPad/Android/Windows Phone Apps