政情：公民講場：健康碼仲未兌現 陳肇始又冇口齒

新冠肺炎疫情持續多月，粵港澳三地早前構思跨境「健康碼」，當消息傳出時，唔少政黨都即刻搵食物及衞生局局長陳肇始爭取落實「健康碼」，並了解細節，例如幾時出台、檢測費用等，仲有議員鬧爆話香港嘅檢測費用太貴添。大家以為檢測費都出埋，諗住實食無黐牙啦，點知尋日政府忽然話未係時候推行。其實一批經常往返內地工作同讀書嘅港人，等健康碼等到頸都長，依家忽然縮沙，唔知陳肇始點樣同社會各界交代喇，市民就話怕你官字兩個口唔敢嘈啫，但等緊「成功爭取」嘅議員實唔會放過你囉！