政情：預算案社福瓣瓣唔掂 議員1000Q驗屍咁驗
今年初爆出收緊長者綜援申領門檻風波，尤其特首林鄭月娥喺立法會講出「各位（議員）批准論」惹來跨黨派「震怒」，明言今年預算案實行「驗屍咁驗」。唔知係咪怒火未熄，預算案又提出斥資買物業，加埋其他政策瓣瓣都唔掂，今年嘅預算案書面提問中，社會福利署繼續成為最備受關注嘅部門，據悉高達逾千條Q（問題），創下近三年新高，睇怕社署署長葉文娟有排解釋嘞！
據悉，秘書處今年一共接獲七千二百三十六條書面提問，較舊年六千四百零三條，增加八百三十三條。現屆立法會目前只有六十九名議員，扣除大會主席唔係財委會委員，共有六十八名議員提出書面問題，即每人平均提出約一百零六條問題。
今年首五名「問題議員」同舊年一樣，工黨嘅張超雄提出一千零六十條問題連任「問題王」，而第二至第五位則輕微調動，依次為公民黨（公文袋）郭家麒、社福界邵家臻、公文袋陳淑莊同譚文豪。
年初爆收緊長者綜援風波
至於備受關注首五個政府部門，社署連續三年奪冠，由一七年的九百八十八條，喺一八年微跌至六百九十八條，今年急增至一千零二十三條，創近年新高，難免令人將數目同收緊長者綜援門檻嘅風波掛鈎，今鋪班議員真係「驗屍咁驗」，免得再落人口實。其次繼續係教育局，有六百零四條、第三位係食物及衞生局（衞生科），有四百一十九條、第四位係食物環境衞生署，有二百四十八條，最後一位係環境保護署，有二百四十二條。
立法會財務委員會主席陳健波接受查詢時直指提問太多，透露今年曾經想過限制每名議員提問數量，以求令部門可更聚焦回應提問，但唔想太過設限所以冇做，或者明年預算案前再諮詢議員意見。
問咁多條問題要使幾錢？根據財經事務及庫務局喺二○一五年提過，每條問題成本高達四千八百元，唔計通脹去計算，今年嘅提問成本至少約為三千四百七十三萬元公帑，認真嘥錢！不過，政府為免審到沒完沒了，每年都係承諾優先處理首三千三百條問題。