幕後支持隊友全心比賽 向Shero港超致敬

Kannas(on.cc東網港超聯主播) 盼球迷投入本地波

各位球迷每逢直播賽事的賽後訪問，以及每星期播出的《港超聯精華節目》都會跟她見面的Kannas，自大學畢業後便加盟《東方日報》體育組，與「司徒大導」和「大頭」並肩作戰。但原來對於自己的崗位，她卻有特別的見解。「大家喺直播波或者精華節目都會見到我，我好享受呢個崗位，其中一個原因係可以喺好前線去接觸球員同球迷，但我知道呢個角色或者崗位係有限期嘅，亦都唔係淨係得我做到，所以我會喺限期到之前不斷努力，盡力去為推動本地波出力。」

採訪經驗寶貴又難忘

「其實日常工作都有好多難忘事、好多挑戰，平日大家見到嘅文字直播，都係要一邊學一邊做一邊增值自己。今年好開心可以Keep住有新嘗試，試過親身落草地拍片，同主持唔同種類嘅直播賽事等等，喺我心目中都係非常寶貴同難忘嘅體驗。」Kannas表示。

踩入球場專訪球星是難得體驗之一。	與隊中華洋球員感情要好。	Gigi

許多人都說從事本地波工作的人，十個中八個都很有抱負，不知擁有不少Fans的Kannas又如何？「最想係有更多人可以透過我去認識本地波，令更多人可以將對英超嘅熱情投入在港超，希望有朝一日本地波可以成為大家經常掛喺嘴邊嘅話題。」

Jannis（左）	深受球員愛戴的「Karen媽」，開賽前扮幸運童，拖林嘉緯進場。	Winnie（左）

Kaka(和富大埔公關及傳媒主任) 幕後支持隊友全心比賽

「主要職責係處理公關工作，好似向傳媒發稿、處理傳媒及球迷查詢、社交媒體同球迷會運作等等，但因為亞協盃就需要處理一啲未試過嘅行政工作，好似幫球隊申請作客北韓簽證、同對手代表保持聯繫、安排食宿等等。好多謝大埔球會，特別係『堅Sir』同主席Gary畀機會我，可以接觸到未試過嘅挑戰。喺漫長球季入面，球隊總有遇上低潮嘅時候，好似銀牌決賽輸咗，但一班球員態度相當正面，推動到身為幕後一分子嘅我都想付出多啲，令球員可以全心全意去比賽。」「++姐」表示。

剛隨大埔遠征北韓的她謂：「籌備亞協盃係相當難得嘅經驗，以前做記者都有跟過隊，但當時有專人安排好晒，自己做番採訪就得。但依家轉換咗角色，好多細節都要巨細無遺，今次作客北韓，因為溝通問題最初都有啲阻滯，但喺足總同球隊職員各方努力下，總算搞掂。」她再分享多一件與亞協盃有關的事：「之前公布亞協盃外援名單，球員落選失望係人之常情，我可以做嘅就係開解同鼓勵。嗰位球員非常專業，之後一日佢喺聯賽建功兼協助球隊贏波，賽後佢同我講要向前看、一齊加油，窩心之餘亦感受到團隊氣氛。」最後，「++姐」不忘提提大家要多多支持香港足球，在本月13日亞協盃賽事入場撐和富大埔。

Gigi羅碧芝(國際女子足球裁判員) 想做無名英雄

要數目前最多球迷認識的港超女性，相信她肯認第二都沒有人敢認第一，她就是首位執法港超聯的女主裁判Gigi羅碧芝。「可能有時球迷會好好奇，其實我同其他男子裁判員所做嘅嘢係無分別。我唔係想出名，只係希望自己可以成為『無名英雄』，令到賽事順利完成，球隊同球迷都滿意我嘅執法。」Gigi謂。

現職是代課老師的Gigi跟大家分享一件每次她擔任後備裁判員時球場都會發生的事，她說：「始終男女有別，所以每次我做『第四』（即後備裁判員），賽前入去球隊更衣室對名，球隊職員都會大緊張，不斷提醒球員着番條褲，擔心會嚇親我喎！哈！哈！」

雖然球證在香港並非全職業，但Gigi在其崗位上仍然有崇高的目標，就是：「首先希望自己可以代表香港，出外執法更多高水平嘅賽事；本地波方面，希望自己嘅執法水準可以不斷提升，可以執法本地高水平同重要嘅賽事。另一方面，都好想利用導師同考核員嘅身分，幫到本地年青裁判員去成長，令更多具天分嘅新一代成為我哋嘅一分子。」

Jannis(傑志行政助理) 與偶像共事

許多在港超聯球隊的職員，本身都是本地波球迷，傑志的Jannis（圖左）便是其中一位，她說：「我喺畢業之前曾經自薦加入傑志，結果喺畢業之後真係畀我誤打誤撞，如願成為咗球會一分子。同好多之前嘅偶像做同事，一齊經歷高低起跌，好多片段都好難忘。」

至於在工作上有甚麼目標呢？Jannis答道：「因為我主要負責足球學院嘅工作，所以最希望係可以見到依家嘅學員，將來可以成為職業足球員。」

Karen(東方龍獅足球隊隊醫) 默默守護球員健康

每逢東方龍獅的比賽，有球員受傷倒地，大家都會見到Karen與助手入場為球員治理，但其實隊醫的工作，遠比大家見到的為多和複雜。「係呀！好多人以為隊醫淨係處理球員嘅傷患，比賽嗰陣跑入球場幫受傷球員噴兩下止痛劑就搞掂，但呢啲都只係隊醫工作嘅一小部分；協助傷患球員操得番、確保球員冇操過龍，同預防傷患先係隊醫嘅主要工作。」視隊醫為「球隊守護者」的「Karen媽」表示。

「Karen媽」在本地球圈備受球員愛戴，早在港甲年代，她已開始其隊醫工作，先後「守護」過晨曦和太陽飛馬，多年來又有甚麼難忘回憶呢？她答道：「好多，好似當年晨曦去踢亞協盃，作客黎巴嫩會見到成棟大廈外牆都係子彈窿，沿途要由軍隊開路；作客馬爾代夫就住喺小島兼有陽光與海灘，呢啲都係好美好嘅回憶。」

身為隊醫，「Karen媽」有一個心願，就是：「球員喺訓練期間零傷患！比賽期間有碰撞，受傷難免，但訓練期間出現嘅傷患，絕對可以避免！另外希望將來有機會同一啲高水平聯賽嘅球隊隊醫交流吓，慢慢接到軌。」

Winnie(足總市場推廣經理) 推廣足運極具意義

「由細到大我都好鍾意球類運動，細個嗰陣成日去睇爸爸踢波，依家好多時都會帶爸爸入場睇港超聯，感覺很特別。」上季加入足總的Winnie笑說。

「本地足球嘅市場推廣係一份好有意思嘅工作，好希望透過各類型嘅推廣活動，進一步普及本地足球文化。一場球賽，唔單只要有球隊同職、球員，球迷都好重要，如果一場球賽係冇球迷嘅，咁又有咩意思呢？希望逐漸會多啲人欣賞本地波，支持所有為推動足球運動努力付出嘅職球員，令本地足運可以好好發展。」目前已開始與同事為新一季港超聯「度橋」的Winnie道。

圖/文：戴陶蔚（部分相片由受訪者提供）