中環出更：劉慧卿鬧爆張建宗 叫劉燕卿頂上
政府高官理應係有能者居之，所以實績平平嘅政務司司長張建宗早前一度爆出會離任嘅傳聞，雖然至今佢仲在任，但立法會前議員劉慧卿（卿姐）尋日竟然喺網台節目上，建議申訴專員劉燕卿（Connie）頂上司長個位。
當時Connie講起任內嘅實績，解決咗唔少問題，卿姐見狀就即刻提起近年政府經常解決唔到問題，房屋、醫療、交通樣樣唔掂，仲同Connie講：「早排聽聞政務司司長個位有空缺，早知就搵你去幫吓手解決問題啦！」唔通卿姐想叫Connie出任政務司司長？Connie當然隨即婉拒，謙稱自己「邊有能力」！
劉燕卿未打算再任公職
不過講到Connie即將卸任申訴專員一職，佢就話因為年紀大，所以決定花多啲時間陪屋企人，暫時未有打算再任公職。事關佢忙咗咁多年，實在太少陪屋企人，多少有啲歉疚，例如佢個女細個時要每日簽手冊，但Connie因為工作關係未必成日見到個女，所以一簽就要簽晒成個星期，次次個女見到都好唔開心，跟住就喊！所以嚟緊會花多啲時間陪個孫咁話。
卓妮