政情：報「豬年通勝攻略」課程 陳智遠變身玄學家

其實陳都係為勢所逼，事關佢日前喺社交網站貼文狂呻，話佢個導遊證續期死線在即，但仲要完成十二個鐘「自我增值」培訓時數先達標，一身工作纏身嘅佢諗起要擠十二個鐘出嚟，直言係晴天霹靂。

呻導遊續證課程選擇少

由於坊間針對導遊培訓課程選擇少，最後佢報咗「豬年通勝攻略」，但都只係攞到三個鐘時數。佢大呻邊個設計啲咁落後嘅規定，仲話再係咁真係組織導遊同業一齊抗爭。

呢段貼文惹嚟大批網友熱議，仲稱呼佢做陳師傅，又問佢「豬年通勝攻略」究竟學乜、今年沖太歲應該去邊區行大運等，亦有網友問導遊同通勝有乜關係。佢就回覆話有時帶團都會講下通勝係乜喎。另外，亦都有網友叫佢參選立法會旅遊界，不過佢會唔會好似食衞局前政助陳凱欣咁進軍立法會就唔知喇。