政情：公民講場：劉利群 測滲水認落後 新科技又嫌貴

食物環境衞生署署長劉利群尋日出席屯門區議會會議時，畀班議員當面批評滲水辦用色水測試嚟確定滲水源頭嘅方法落後，而佢竟然直認不諱，仲加多句話係「原始」添，又話依家正試緊新科技，用紅外線熱像分析同微波斷層掃描技術測試滲水源頭，但又話成本高，每次測試費用達一萬蚊，又話唔係靈丹妙藥嚟，有局限性o架！咁即係點？原始方法效果唔好，新科技又嫌貴，佢根本冇諗過長期受滲水影響嘅居民受苦，只係一味撳住荷包，一味拖。