政情：來回瑞士搭長途機 李國棟有陰影怕飛
香港醫學專科學院前主席李國棟向來識飲識食，亦會經常周遊列國，但竟然大嘆聞到飛機陣味都驚，點解會有咁大轉變？
新春因此選擇留港
李國棟喺新年前特登搭十幾個鐘飛機遠赴瑞士，喺當地逗留簽備忘錄，過後就立即啟程返港，直言來回坐三十個鐘飛機，只為十幾個小時活動，所以回程時聞到飛機味都驚囉！佢仲話因為呢個原因，早排農曆新年選擇留港度歲，不過工作需要而要乘搭飛機就另作別論咁話喎。
佢仲透露，今年係佢十年來首次留喺香港過農曆新年，直言感覺良好，佢更把握機會去西貢放狗，感受到西貢區寵物友善，仲大擦海鮮添！