和富大埔挑戰黎明SC
「亞協盃附加賽」首回合今日上演，遠赴北韓的港超球隊和富大埔於香港時間下午3時鬥黎明SC。比賽在金日成競技場舉行，香港隊去年於亞洲盃外圍賽曾在該球場以兩球見負。這個仿真草球場能容納5萬人，勢成黎明SC地獄主場。和富大埔9年後再次代表香港出戰，為躋身分組賽必定「搏到盡」，主教練李志堅明言「以不敗為目標」！
和富大埔於周一抵達平壤備戰，「堅Sir」指：「北韓無論天氣、飲食同接待都比想像中理想，冇得上網相信令球員更專心備戰。唯一擔心嘅係天氣乾燥同空氣污染，部分球員有呼吸道敏感徵狀，但問題不大。最緊要係初段盡快入局，適應場地、節奏同用波力度，因與平時港超用波唔同。」他又謂對手踢法甚有紀律，左路側擊力強需留神。
冇得上網更專心備戰
「堅Sir」表示大埔今仗可「夫添」應戰：「早前拉傷大腿嘅哈利未復十足狀態，會臨場再決定是否正選上陣。上兩場養傷嘅隊長黃威則冇大礙。如果今場和波，等到13號主場定勝負，都算係心目中嘅理想賽果。」至於季中加盟的射手辛祖表示：「去年港隊作客北韓因停賽未有隨行，今次覺得好新鮮。嚟到大埔比想像中快融入，球隊士氣非常好，有信心可以喺本地同亞洲賽爭取佳績。」
黎明SC全稱黎明體育團，逾半球員屬1998年或以後出生，最年長亦只有25歲，主力包括司職前鋒的隊長金成民，以及李勳、金光瑾、朴哲英等，前U19小國腳崔鎮南更曾效力意大利低組別球隊馬切拉塔的青年軍，是支活力充沛的勁旅。黎明SC與和富大埔兩回合的勝方將可進身I組，同組有另一香港代表傑志、中華台北球隊航源FC，及北韓代表4.25 SC。
陳焌鏗報道