政情：拖延傾5G修例無期 邱騰華遭議員追數
商務及經濟發展局同通訊事務管理局喺去年底公布，香港今年將邁向5G（第五代流動通訊）新時代，準備年中拍賣5G頻譜。不過，拍賣前要諮詢立法會做少少修例，本來立法會資訊科技及廣播事務委員會已安排喺一月例會討論，但商經局遲遲未交文件，議員左等右等，點知商經局交咗其他項目上會，話5G會延至二月討論，後來索性變埋「待議事項」，搞到一班議員擔心趕唔切修例，推5G隨時凍過水！
近年全球都討論推出5G，香港卻遲遲都未有聲氣，形勢明顯大大落後於世界各地城市。去年底商經局同通訊局終於有作為，話決定指配部分頻譜，最快今年四月營辦商就可以提供5G服務，其餘要拍賣嘅頻譜就要等修例，至今年七至八月開始陸續分三次拍賣。
屢次押後 淪待議最尾一項
為咗加快進程，資訊科技及廣播事務委員會好快已安排喺一月例會討論有關安排。殊不知開會前幾日，商經局向委員會主席葛珮帆（EQ）要求，想先討論《娛樂特別效果（費用）規例》，將5G延至二月會議討論。當時商經局政治助理馮海容回覆查詢時就話，冇特別問題，只係文件未準備好啫。到一月底，政府又向EQ要求押後討論5G，改為先討論「終止模擬電視廣播」。目前5G已淪為待議事項嘅最後一項，建議討論時間為「有待確定」。
邱：當局做緊好多準備工夫
究竟出現咗咩問題？EQ有啲勞氣話「我都想知」。不同黨派嘅議員都好關心幾時可以推出5G，話會繼續追商經局局長邱騰華交貨。委員會副主席兼資訊科技界議員莫乃光更慨嘆，唔知政府搞緊乜，因為項目冇乜爭議，業界只係想快啲推出，擔心政府再唔攞上會，之後又要審預算案及其他法例，就算議員加班、加會都趕唔切七月前修例。
莫乃光聯同其他議員去信要求政府解釋，點解要押後兩次討論5G，邱騰華就話，當局做緊好多準備工夫，會適時向委員會匯報喎。真係名副其實「皇帝唔急、太監急」，邱騰華懶懶閒，議員就擔心走唔切程序，再拖落去，新時代都變舊時代喇！