政情：今日你上鏡：做瑜伽唔輸後生女 葉劉單腳企冇難度
都市人經常坐喺辦公室，好易坐到肌肉硬晒軚，間中做吓瑜伽則有助伸展。新民黨立法會議員葉劉淑儀（葉太）今年已經六十八歲，但原來佢都幾好「身手」，平時更有做開健身，柔軟度都唔會輸畀班後生女，佢日前更帶埋該黨副主席黎棟國同南區區議員陳家珮一齊出席活動做瑜伽添！
話女兒偶爾教幾招
葉太喺社交網站發相，見佢同黎、陳二人做起瑜伽「戰士二式」等動作時都有板有眼，就算單腳企都平衡得好好。葉太就話，自己雖然唔係瑜伽專家，但平時個女偶爾都會教佢做啲簡單動作，所以做幾招舒展筋骨動作都冇難度，工作人員仲笑佢哋做得似模似樣。