香港公廁衞生情況欠佳，真係「臭」名遠播，立法會旅遊界議員姚思榮早已批評公廁設施同衞生太差，影響遊客觀感，大力推動「公廁革命」，仲列咗張惡劣公廁名單，要求當局跟進，最後政府先決定率先翻新廿三個位於旅遊景點嘅公廁，真係踢一踢先郁一郁。有消息指，政府會喺新一份財政預算案預留五億元，翻新全港二百個公廁，忽然出手咁疏爽，唔通負責公廁問題嘅食物及衞生局局長陳肇始都被臭氣熏天嘅公廁嚇親，終於醒覺要做嘢？抑或係財政司司長陳茂波被公廁臭親呢？
