政情：A380即將停產 蔡少森話淘汰合理

耗油量高 唔環保

蔡少森話，A380未投入服務時已經新聞多多，例如要克服龐大機體所帶來嘅技術問題，交貨時間又一拖再拖，搞到部分航空公司都削減訂貨數量，變相令該飛機製造商嘅回本期一再延長，而推動巨大機體所造成嘅較高耗油量，亦唔符合環保效益，居高不下嘅飛行成本令航空公司大傷腦筋。所以佢就覺得，雖然A380喺航空業界創下紀錄，但唔合潮流嘅事物始終都會被淘汰。

蔡少森又話，佢試過坐A380由香港飛去三藩市，甫入機艙的確被其寬敞內籠布局震撼，不過因為載客量多，飛機一着陸就有幾百人一齊過關，搞到入境大堂人頭湧湧，好多人見到咁嘅場面都話怕怕喇。