政情：林健鋒講食唔停口最愛家鄉秋茄
立法會議員林健鋒（Jeffrey）係南海人，尋日佢出席南海特色文化嘉年華活動時，講起自己家鄉最出名嘅秋茄，即係一種綠色嘅茄子，只需落豉油蒸，就相當好味。不過秋天已過，所以依家整唔到畀大家食嘞！
出國讀書帶埋飯煲
講開煮嘢，Jeffrey話自己同好多南海人一樣，都識得煮飯，最叻係炒蛋同炒菜，啲菜炒完都仲係綠色㗎！六、七十年代佢喺外國讀書時，都帶個電飯煲去，當年未有即食麵，媽媽就幫佢準備啲麵餅帶去。佢話，曾經讀過一間學校係包伙食嘅，校方一度試過唔准學生帶嘢食，佢想飲凍可樂但又唔敢擺喺雪櫃，冬天時就放出窗外半小時，咁就夠凍嘞！