政情：黃碧雲 蔣麗芸 破鎘齊上失敗收場
立法會尋日舉行新一個立法年度首次大會，政府提嘅《二○一八年食物攙雜（金屬雜質含量）（修訂）規例》，建議將精米、糙米、小麥同葉菜類蔬菜的鎘含量上限，由現例每公斤○點一毫克上調至每公斤○點二毫克。不過民主黨（白鴿黨）嘅立法會議員黃碧雲（一舊雲）就提出修訂，維持現行規例嘅鎘含量最高准許濃度標準不變。而過往經常同一舊雲喺立法會唇槍舌劍嘅民建聯（民記）立法會議員蔣麗芸（Ann），今次竟然冇同一舊雲唱反調，仲支持佢嘅修訂添！
Ann話冇辦法支持陳肇始
阿Ann喺會上一開始發言就話要支持一舊雲，又話雖然主責嘅食物及衞生局局長陳肇始係一個好局長，但今次真係冇辦法支持陳肇始，因為今次係關乎市民嘅健康。佢又話，雖然政府今次嘅建議係根據食品法典委員會標準訂定，但中國人習慣食飯，同西方人唔同，發育時期嘅後生仔仲一日食幾碗飯，所以對於食物，係絕對唔可以放寬有毒金屬物品含量嘅標準喎。佢仲話佢同民記都會支持一舊雲嘅修訂。
一舊雲聽到Ann難得撐自己，就話好高興民記支持佢，又話知道民記另一立法會議員葛珮帆（EQ）係素食者，就算要減肥減食碳水化合物，唔食米都要食菜，如果政府放寬標準，素食者就無可避免要吸收多一倍鎘。
泛民經常都將「國際標準」掛喺口邊，但今次一舊雲就將「國際標準」掉埋一邊喇！佢話當局雖然話新規定係跟國際標準，但外國人係食薯仔多，唔係葉菜類蔬菜，而香港人係食菜嘅，所以陳肇始作為食衞局局長，唔係要睇商家做唔做到生意，或中國南方米入唔入到香港，而係要按香港人嘅飲食習慣維護市民健康咁話。
首次同聲同氣槍口一致
雖然阿Ann同一舊雲難得立場一致，但同黨友反而意見相左。同屬民記嘅漁農界議員何俊賢（高佬賢）就唔贊成一舊雲嘅修訂，係唯一就其修訂投棄權票嘅民記議員。高佬賢話標準唔係唔郁唔變就最好，擔心一舊雲嘅修訂通過嘅話，長遠會形成「食物安全霸權」，日後有關食安嘅檢討都唔使再參考國際標準。佢亦認為唔應該再增加限制令耕種同生產問題惡化，為農民有不必要嘅壓力。
雖然今次阿Ann同民記大部分議員都支持一舊雲修訂，但喺商界議員嘅反對之下，一舊雲嘅修訂最終都喺功能界別未獲通過情況下被否決。佢同阿Ann第一次同聲同氣槍口一致，但就無功而還，唔知會唔會好失望呢？