中環出更:嗌錯周浩鼎做鄭泳舜 葉劉讚靚仔補鑊

立法會尋日正式復會,隨即就財務委員會轄下兩個小組委員會選舉正、副主席。新民黨葉劉淑儀喺冇對手嘅情況下,繼續連任新一年度嘅人事編制小組主席。唔知係咪休會太耐,放咗一輪假,葉劉淑儀喺隨後嘅會議上,竟然將民建聯(民記)周浩鼎,叫錯做佢嘅黨友鄭泳舜,事後仲話「兩個都咁靚仔」,擺明係補鑊喇!

話自己太耐冇開會

話說喺選出主席後,民記的黃定光提名周浩鼎出任副主席,而鄭泳舜就和議,周浩鼎最後亦喺冇對手嘅情況下自動當選。葉劉喺宣布結果時,竟然將周浩鼎嗌錯係鄭泳舜。知道嗌錯後,佢自行解畫,向周浩鼎連番道歉,仲解釋話自己太耐冇開會,而周浩鼎就大笑同致謝。

至於工務小組委員會,經民聯盧偉國、專業議政莫乃光都喺冇對手嘅情況下,自動當選連任正、副主席。

卓妮

第一手消息請下載on.cc東網iPhone/iPad/Android/Windows Phone Apps