政情：議員共豪遊不共患難
好多人話法國治安差，原來近日被批評接受豪遊法國款待嘅九名立法會議員及行政會議成員，喺旅途都遇到搶劫，據聞除咗會計界議員梁繼昌外，其他團友無一幸免，唔係被偷嘢，就係被搶嘢，好彩佢哋齊心一致，無再分泛民同建制，睇緊彼此財物，先至逃過損失。不過，呢段友誼只維持咗幾日，因為眾人返港後被質疑接受款待利益而闖禍，於是由團結變成大難臨頭各自飛。
棠嫂避劫 馬逢國被摸臀
話說今次法國之旅只係幾日行程，雖然話頗為趕急，但亦有自由活動時間，所以大夥兒當有時間就遊覽巴黎，期間唔單止建立彼此友誼，仲發生咗啲難忘嘅經歷添。先有今次旅程唯一一位行會成員鄭耀棠（棠哥）嘅太太遇劫事件，聽聞棠嫂當時喺下榻嘅酒店外候車，點知突然出現四名吉卜賽女子，仲夾手夾腳搶佢手袋，好彩棠嫂身手敏捷，加上酒店職員同團友及時幫手阻止，棠嫂先至可以避過呢一「劫」。
其後就輪到議員涂謹申、何俊仁喺地鐵車卡內被偷錢包；鍾國斌嘅太太又見到有人成隻手伸咗入佢手袋；馬逢國就喺地鐵站內被人索簽名及摸屁股。大家咪以為馬逢國特別威水，因為喺當地咁樣攞簽名嘅人原來係騙徒，當遊客簽咗名，佢哋就會話簽咗約要捐款。至於被摸屁股，當然唔係佢特別吸引，只係想偷佢銀包啫！
聽聞旅途中，被評為最幸運嗰位係梁繼昌，唔知係咪因為啲小偷識得睇相，知佢做會計，對於同數字有關嘅事物特別敏感，所以唔敢偷佢嘢呢？而最醒目嗰位就係保險界議員陳健波，皆因佢帶備件多袋背心，將啲錢財分開嚟放，真係夠晒「保險」。因為呢啲遭遇，令團友變得老友鬼鬼，仲話要一齊保持警覺，做對方嘅保安員。不過，佢哋返港後被批評接受款待利益時，就變得針鋒相對，人性莫過於此。