政情：唔願有麒麟臂 張曼莉想減肥
各決策局嘅局長政治政助要負責游說各黨派，爭取各黨派支持當局政策措施，有時仲要陪局長落區，工作量都唔少。創新及科技局政治助理張曼莉（Lillian）上任一年，日前就自爆做政助之後，有時做嘢做到好夜先返屋企食飯，搞到肥咗好多，男朋友仲向佢暗示，話佢有「麒麟臂」。男朋友咁唔畀面，難怪佢都話自己有需要減肥喇。
着衫感覺有啲窄
Lillian話，做咗政助以來，着衫時都感覺到有啲窄，屋企人又話佢肥咗，有次同男朋友出街食飯，男朋友見到佢手臂之後，就叫佢唔好舉高手，暗示佢有麒麟臂添。依家如果佢好夜先返屋企食飯嘅話，屋企人都直頭勸佢唔好食。聽佢咁講，問題好似好嚴重咁噃，咁其實佢重咗幾多呢？佢就話自己冇上磅習慣，所以都唔知肥咗幾多喎。究竟係真係唔知，定係體重係女人秘密呢？
對於家人同男朋友都話自己肥咗，佢都話真係需要減下肥喇，但因為冇做開運動，所以都無從入手，唔知點減咁話。其實都唔一定要瘦先靚嘅，健康先係最重要。