政情：周伯展認保守 唔做激光矯視
對得電腦、手機屏幕多，依家唔少人都有近視，要做「四眼仔」，唔想戴眼鏡咁麻煩，就要佩戴隱形眼鏡或接受激光矯視手術喇。不過，香港眼科醫學院前院長周伯展就多年嚟都冇同眼鏡告別。唔通作為眼科醫生嘅佢都信唔過現今嘅矯視技術？
周伯展話，依家年輕一批醫生同醫科生大多數都做咗矯視手術，都有唔少眼科醫生嘅仔女去做，所以現時嘅技術已經相當成熟，只係佢自己保守，先未有接受矯視手術。但佢亦都話，近視度數超過六百度嘅人士，即使完成矯視手術都仍然係眼科疾病嘅高危一族，唔可以掉以輕心喎。
計劃為柬埔寨貧民醫白內障
另外，周伯展最近就搞緊一個為柬埔寨嘅窮困人士做白內障手術嘅計劃，大嘆慈善工作對醫生嚟講並非易事，因為離港期間診所嘅租金同埋員工薪金都要照畀，好彩眼科病人較少係急症，所以對病人影響唔大，反而最大困難係要放低屋企咁話。