政情：曾被爆竊疑風水差橄欖舊議辦冇人吼

月租近$9000 胡志偉嫌貴唔要

立法會議員胡志偉係現任九龍東五位議員當中，唯一一個對呢個議辦有興趣，但有傳佢抽中籤都唔肯要。不過，佢否認中籤，堅持話係同房屋署傾唔掂數，因議辦月租高達近九千元，所以曾經「還價」話想租一半，房屋署又唔肯，唔啱使就唔要喎。

至於柯創盛（柯仔）接棒橄欖議席後，點解唔接手埋個議辦呢？柯仔就好似「三姑六婆」上身咁話：「死囉，做乜鬼冇人要，係咪風水唔好？」又話喺觀塘區內已經有辦事處，唔打算承租嘞。佢仲慨嘆話，上任至今無法喺黃大仙區內嘅公共屋邨搵到位「落腳」，最近抽順天邨一個新辦事處又唔中籤，直言唔好以為做咗房屋委員會委員就有着數，實情房屋署都幫唔到佢。

九東有黨友 陸頌雄唔會落腳

有傳勞工界議員陸頌雄下屆有意落戶九龍東。難得九龍東有位冇人吼，會唔會考慮入主？佢就話九龍東有黨友黃國健（KK）同另一勞工界議員何啟明，唔會考慮落腳喎，仲建議不如問吓何租唔租，話可能何會有興趣。

坊間一直盛傳KK會放棄競逐連任，由何啟明接棒，但係兩人喺油塘邨早就已經有聯合議辦，問到會唔會拆夥？何大笑話：「玩嘢咩？」解釋油塘邨只有四幢大廈，每座都有一個議辦，搞到丟空嘅議辦猶如雞肋，食之無味棄之可惜，但佢就唔會無端端同KK分家。何又話，油塘邨啲街坊好可愛，每逢大時大節議辦有嘢派時，就會聯群結隊出動，個個議辦都攞齊。

世界就係咁奇怪，有啲區議員出盡力都搵唔到議辦落腳，偏偏就會有議辦冇人要。房屋署規劃時根本無考慮吓現實情況，搞到市民一係被議員包圍，一係就想搵個人睇吓都無，而橄欖早已人去樓空，既然個議辦冇人要，不如攞出嚟做其他用途好過啦！