政情：麥錦生撐花碼字文化價值
潮流興講文化保育，連帶全港唯一手寫小巴牌師傅麥錦生嘅墨寶，都成為文化界珍視嘅對象。寫咗小巴牌近半世紀嘅麥錦生話，昔日香港嘅街坊消費場所，普遍以花碼數字來標明價目，小巴車資當然亦唔例外。而呢種由杭州商人傳入，清朝時代已經普遍使用嘅花碼字，後來竟絕迹於內地，香港就成為少數使用花碼字嘅華人社會。
寫對照表貼餐廳宣傳被盜
不過，八十年代開始為咗遷就外傭，小巴車資牌就改用阿拉伯數字書寫，隨後就連街市菜檔亦棄用花碼字。由於花碼字係源自珠算操作，未接觸過算盤嘅年輕一代自然視花碼字為「火星文」。為免花碼字失傳，麥錦生就試過寫一份花碼字對照表，並張貼在某社企餐廳內宣傳，可是張貼不久就遭人偷走，再貼又再偷，反映花碼字喺某啲人眼中，仍有文化價值。