中環出更：陳茂波抖暑 帶挈楊偉雄過財爺癮
立法會正值暑假休會，政府高官近日都紛紛乘機放假攤抖下。財政司司長陳茂波由下周四開始休假約一星期，至到本月廿二日先至復工，帶挈創新及科技局局長楊偉雄可以署任做吓「財爺」。唔知佢之後會唔會以此向大家炫耀一下，話佢真係做過「財爺」呢？
陳茂波休假只係幾日，但期間就有兩位署任「財爺」，首四天就由楊偉雄署任，之後就係財經事務及庫務局局長劉怡翔負責。楊署任期間包括周六同周日，係港股休市日子，相信佢可以過個愉快周末，平靜地度過署任日子。睇番資料，楊上任局長近三年，去年都試過因為陳同其他官員放假，過過「財爺」癮，相信今次應該都駕輕就熟喇。
署任4日 後交劉怡翔接手
按照過往慣例，財政司司長外訪或休假，署任財政司司長職務嘅依次應該係劉怡翔同商務及經濟發展局局長邱騰華，因為劉掌管嘅財庫局負責財金相關工作，萬一財政司司長放假期間，環球經濟有咩動盪都可以暫時處理，但由於劉於本月三日至十八日休假，邱亦於下周三至八月三十一日休假，所以要等劉放完假，先可以接手署任財政司司長一職喇。
卓妮