政情：張建宗自家製短片 畫面矇變低清版
新政府上任一年，部分司局長尋日喺Facebook上載短片，回顧過往一年嘅工作同未來展望，政務司司長張建宗仲標明係「自編自導自演」、自家製作嘅短片，但唔知點解畫面比其他局長嘅短片矇，睇嚟係像素低，變咗「低清版」。
張建宗喺短片中有唔少親自上陣嘅鏡頭同旁白，佢話司局長要吸地氣，所以走訪十八區聆聽地區意見，而喺短片中就見到佢同政府總部嘅保安傾偈，又同清潔工握手，可能係藉此表達自己由下而上咁吸地氣啩？佢又講到日後會全力以新思維做好統籌跨局及跨部門嘅工作，而跨世代、跨專業及跨界別都係佢關心嘅問題。不過淨係睇佢呢條片嘅質素，都令人懷疑佢如何統籌帶領香港行好創科呢條路啦！
聶德權跑步短片有活力
反觀政制及內地事務局局長聶德權嘅短片就好有活力，事關佢係用跑步帶起主題《回望 向前 同行》。喺短片中見佢跑過唔少地方，例如沙田城門河畔，仲見到已經換咗老闆嘅畫舫，其後又見佢喺政府總部外跑步，就算喺佢辦公室，亦見放咗個佢跑步嘅人形公仔添，好明顯係互相呼應。