政情：以快餐店比較獄中膳食 黃之鋒鬧白鴿議員離地

香港眾志秘書長黃之鋒接受網媒訪問，被問點睇泛民主派時，佢話有單真人真事，乜嘢叫離地呢？就係白鴿黨有位議員去探監時，問監獄啲嘢難唔難食，有位在囚嘅社運人士答難食，之後嗰位議員繼續問，有無某某連鎖快餐店咁難食呀？對方即時呆咗，之後就同人講以後唔好再叫白鴿黨人去探佢。黃之鋒話，從呢位議員嘅說話就睇到有脫節問題。邊個民主黨議員咁離地？大家不妨估吓喎！不過話時話，嗰位議員冇坐過監，又點知獄中嘅膳食係點呢？黃之鋒係咪反應大咗啲呢？

自言同梁天琦冇得比

黃之鋒喺違法佔領行動期間，衝擊俗稱「公民廣場」嘅政府總部東翼廣場被判囚六個月，而本土民主前線前發言人梁天琦就因參與前年農曆新年旺角暴亂，被裁定暴動罪成被判囚六年。被問到點睇梁天琦時，黃之鋒就話冇得比，因為六年係個乜嘢概念，冇人可以消化到。佢話以前同梁有溝通，但唔熟，喺梁身上睇到嘅係梁被捧成英雄，身上背負包袱，而佢亦有類似經歷。