政情：七一吸金術無靈傳統泛民失光環
前日係七一大遊行，唔少政團都會藉呢個機會乘機吸金，喺遊行路線沿途擺設街站籌款。遊行完結後，亦到咗埋單計數嘅時候喇。今年參與遊行嘅人數繼續減少，根據警方統計嘅數字直頭係二○○三年以來人數最少嘅一次。遊行人數減少，連帶籌款數字亦都受影響，今年唔少政黨嘅籌款額持續下跌，當中屬傳統泛民嘅民主黨、公民黨同埋工黨嘅籌款數字持續探底，每個黨都起碼少咗三萬蚊。當中工黨就更加慘情，籌款跌幅高達三成三，總數唔夠十萬蚊添！
民主黨少咗逾5萬蚊
上年各大政黨嘅籌款數字已錄得下跌，當中公民黨暴跌咗四成，民主黨同工黨就只係跌咗小小。今年三個黨嘅吸金力繼續削減，民主黨得十二萬，跌幅逾三成；公民黨籌到廿二萬三千元，而工黨只得八萬五千元。過去兩年都分別籌得七萬蚊嘅新民主同盟，今年雖然喺補選中贏番一個議席，不過只係籌得四萬七千元，跌幅超過三成七，係芸芸政黨中最大，而實際金額跌得最多嘅就係民主黨，足足冇咗超過五萬蚊。
至於激進泛民方面又如何呢？喺上年跑贏大市、籌得超過五十萬元嘅社民連，今年就再冇幸運之神眷顧喇，只係籌得接近四十六萬三千元，比上年少大約四萬五千元。籌款有跌就自然有升，上年籌款額下跌嘅人民力量，今年就籌得超過十八萬元，比上年略有增加。
未來籌款數字難樂觀
除咗傳統政黨失去吸金光環之外，作為主辦方嘅民間人權陣線今年就籌得約廿萬三千元，較去年微升。而香港眾志同埋小麗民主教室，分別籌得五十三萬同埋廿七萬六千元。一如以往，有部分政黨會將所得嘅籌款捐畀民陣，當中新同盟會扣除成本後，捐出十分一款項。
睇番成個籌款數字，傳統泛民失去市民支持嘅態勢已非常明顯，意味着傳統泛民嘅光環已消逝。民主黨主席胡志偉、公民黨黨魁楊岳橋若唔趁機檢討吓，明年籌款數字就更加難睇嘞！