政情：撤積金對沖 象哥驚跳樓都唔掂

黃定光

平時經常畀人影到昏昏欲睡嘅進出口界議員黃定光（象哥），唔知係咪畀羅致光嘅「微企論」觸動神經，佢質問對方，話兩年後佢唔做議員，要遣散四個助理，加埋成七十六萬幾，就算政府肯畀一半，都要成卅八萬幾，話好多中小企同佢一樣都唔知點算？而喺呢個時候佢嘅發言時間已超時，主席胡志偉就出口叫停，象哥聽到後就話︰「我好耐都冇講嘢啦！畀我講吓都得啩！」胡亦唔敢逆佢意，繼續畀佢講埋。

• 羅致光

羅致光：唔使咁擔心

但羅致光就叫象哥唔使咁擔心，因按政府嘅立法時間表，取消對沖最快要到二二年先實施，佢兩年後選唔到都可以繼續對沖，又話就算佢喺二○年連任，再做多四年，都係要額外畀多兩年不可對沖嘅額外開支，因為取消對沖係用劃線制，劃線前係無追溯力嘅。唔知係咪畀羅致光踢爆冇溫書，象哥就反駁話︰「我唔係講呢條數，係話緊啲仔、啲孫嗰代呀！到時跳樓都唔掂呀！」