大家都知道立法會議員謝偉俊有「法律超人」之稱，不過又有個議員趴喺地下，舉高雙手雙腳扮超人喎，呢個就係立法會財務委員會主席陳健波（波哥），佢喺社交網站上載一段片，教大家做「超人操」醫腰骨痛呀，仲話做完條腰好有力。做公職果然要有腰骨呀吓！波哥又笑笑口咁話，會問吓謝偉俊識唔識做「超人操」喎。
波哥話近年因為椎間盤凸出而腰骨痛，但又唔想開刀做手術，不時都會游水紓緩痛症，依家開財委會一坐就四、五個鐘，坐得耐都會痛，所以就介紹一個「超人操」，先趴喺地下，再舉高雙手雙腳，胸口亦離地，好似超人咁，只要每日做番五秒，咁就可以練到腰背肌肉，紓緩痛楚，自己每晚臨瞓前都會做十五秒，腰痛少咗好多添！
講開又講，佢話以後逢周二會喺社交網站貼文，欄目叫「生活一分鐘」，講吓音樂、行山、攝影等輕鬆話題，大家日後可以留意下嘞！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
