政情：五奪最有禮貌大獎 蔡奉孝獲曾國衞嘉許
香港向來都係好客之都，旅客第一時間嚟到香港，過關辦理入境手續嗰陣，如果職員笑臉迎人，令旅客有賓至如歸嘅感覺，肯定對香港大幅加分。嗱，喺機場當更嘅高級入境事務助理員蔡奉孝，就一定係對旅客彬彬有禮，唔係點會連續五年獲選為香港「最有禮貌入境管制人員」，仲得到入境處一哥曾國衞嘉許，真係要畀個Like。
同獲委任香港禮貌大使
頒獎典禮尋日喺入境事務處總部舉行，曾Sir話原來入境處喺廿二年前，即係一九九六年開始，每年都舉辦「最有禮貌入境管制人員選舉」，目的係鼓勵前線人員喺執行有效出入境管制嘅同時，亦要以熱誠有禮嘅態度對待市民及旅客，提供最優質嘅服務。
蔡奉孝仲獲得旅遊發展局企業事務總經理梁美寶委任為「香港禮貌大使」，認真夠威。