政情：坐公眾席開會 共用無線咪 區議員轟秘書處防疫不力
疫情陰霾下，區議會開會都有新玩法？元朗區議會尋日召開交通及運輸委員會，負責秘書處服務嘅元朗民政事務處就用大量膠帶圍封座位，又要求區議員要隔開一點五米坐，仲安排部分人要坐上公眾席開會添！之不過，秘書處要求坐喺公眾席上嘅區議員發言時共用無線咪，就惹嚟一眾區議員不滿。
斥只許州官放火
該區區議會主席黃偉賢話，包括自己在內約十名區議員被安排坐上公眾席，本來大家都願意配合，但秘書處要佢哋十個人共用兩支咪，惹起交叉感染嘅顧慮，有違防疫原則。佢仲講到，行過側邊五號房時，見到秘書處同官員開會時都係坐隔籬，亦冇相隔一點五米，質疑秘書處做法係「只許州官放火」。
黃就話，佢哋最後決定走番落會議枱隔位坐，覺得每個人都用番自己枱頭嘅獨立咪會比較衞生，會議最終照常進行。而另一區議員王伯羽就喺Facebook發文，批評秘書處自把自為，仲話「其實世上冇完美嘅抗疫措施，但起碼係合乎常理同有科學根據囉。」