泛民主派立法會議員過往都會提出平反六四嘅無約束力議案，但就曾經因議程安排同拉布，而未能趕及喺六月四日前夕進行辯論。不過，立法會最新資料顯示，有泛民議員最快可以喺兩星期後嘅大會上動議辯論平反六四，但提出嘅議員，其所屬政黨就未曾提過六四議案，到底係邊個抽中提出議案呢？
過去每年五月至六月期間動議「毋忘六四，平反八九民運」議案，多數係身兼支聯會常委或民主黨議員提出，但係今年竟然係由議員陳淑莊提出，係其所屬政黨公民黨首次有議員提出六四議案。而陳淑莊已作出預告，最快喺五月九日嘅會議上辯論六四議案。
不過，展開辯論前，首先要完成審議代表財政預算案嘅《二○一八年撥款條例草案》。近年立法會主席喺審議預算案時都會剪布，加上六月四日前仲有四次會議，估計今年有機會趕及喺六月四日前夕辯論六四議案喇。