政情：無緣補選 馮檢基仍使29萬
立法會四席補選塵埃落定，喺民主派就立法會補選舉行嘅初選中敗選嘅民協立法會前議員馮檢基（阿基），係眾多初選參選人當中率先申報選舉開支嘅人，雖然無緣參加補選，佢仍然使咗廿九萬元，當中包括支付民主動力舉行初選嘅八萬五千元，而佢獲得嘅選舉捐贈則有約三萬五千元。
話無論輸贏 預咗使錢
根據申報資料可見，雖然係參加初選，阿基都好重視落地拉票，單係請人協助擺街站同打電話催票都花費近二萬八千元，而佢拍片擺上社交網站Facebook作宣傳，就只係用咗近一萬四千元。喺選舉捐贈方面，佢就分別獲民協同民主動力捐贈近一萬二千元及約二萬三千元嘅服務同貨品，而現金捐贈就冇嘞！
初選期間，阿基曾安排旅遊巴接送選民投票，但就唔見有相關嘅開支申報。佢解釋旅遊巴嘅安排係由支持初選嘅地區團體及居民協會發起，並非由佢安排， 加上佢並冇喺有關安排當中宣傳，所以唔計落選舉開支喎。
冇得參加補選都使咁多錢，會唔會覺得唔抵？佢話冇得講抵唔抵嘅，因為參加初選時已知贏咗先可參加補選，所以無論輸定贏，都預咗要使錢o架喇，最重要係初選應該「公公道道」咁去做喎。至於會唔會參加次輪補選，佢話依家最重要係寫好自傳，期望七月書展可以推出喎。