政情：陳恒鑌學賭馬預防認知障礙
打麻雀預防認知障礙症就成日都講，改成買馬仔嚟預防你又聽過未？立法會議員陳恒鑌（Ben）最近開始學買馬，事關佢爸爸成八十歲人，記憶力開始退化，好多嘢都唔記得，不過同賭馬有關嘅就記得一清二楚，問佢邊隻馬近期狀態好、跑咩場地叻、最近贏過幾多場等一律都答得出，令Ben相信賭馬同打麻雀一樣，係可以預防認知障礙症嘅！
「獨樂樂」可作精神寄託
Ben仲話賭馬有個好處，就係唔使好似打麻雀咁湊夠四個人先有得玩，就算得自己一個都可以照玩，仲形容如果打麻雀係「眾樂樂」，賭馬就係「獨樂樂」喎！Ben認為對老人家嚟講，賭馬可以等佢哋有啲精神寄託，有啲嘢可以研究吓，絕對係好事嚟！
雖然Ben爸爸買馬咁叻，但係因為唔想個仔沉迷賭博，所以冇教過Ben，加上佢自己冇乜心癮，所以要學吓先得。