政情：跨境推動電競 鍾培生焗學越南話
曾奪打機世界冠軍嘅電競高手鍾培生（Derek），近年一直幫鄰近地區推動電競，包括台灣、印尼同新加坡等，最近連越南都去埋。講到越南，Derek形容市場發展潛力好大，不過當地人唔識講英文，佢焗住要學越南話喎！
年輕人多 市場潛力大
Derek話，越南人口近一億，當中有六成五係三十五歲以下年輕人，使用手機數量仲多過人口，所以好適合發展電競。但係當地人普遍講越南話，佢惟有喺香港請老師教，依家只係識講數字等簡單嘅詞語。Derek話，希望將香港發展電競嘅經驗，喺鄰近地區內發揚光大。
以前後生仔打機係一件負面嘅事，但係依家就變成充滿正能量，Derek話凡事要適可而止，打機都唔可以太沉迷，最緊要放鬆心情，適當地休息，否則就好事變壞事喇！