中環出更：補選扮文青 區諾軒畀老婆寸
香港眾志常委周庭因被取消參加立法會補選嘅資格，民主派改為支持本身係南區區議員嘅區諾軒參選。已順利當選立法會議員嘅區諾軒自爆，因為佢生得老成，於是喺參選期間扮文青，希望睇起嚟後生啲，仲「掃」咗一堆文青風格嘅衫添。但佢嘅「文青look」似乎就唔多受佢太太歡迎，佢仲話區太見到佢嘅新形象時就寸佢，話佢都已經卅歲人，呢啲衫真係唔係好啱佢着咁話。
區諾軒話連同區議會及立法會選舉已經參加過多場選舉，每次選舉都會購入大批新衫，希望搞好個形象，啱啱過去嘅立法會補選都唔例外，但佢就話始終都係區太幫佢買嘅恤衫最似自己風格。區太聽到唔知會唔會特別心甜呢﹖
文宣品印刷失誤走晒樣
一場選戰除咗服飾形象要注意，文宣物品設計都唔可以忽略。區諾軒話佢得到眾志幫手助選外界都知，但曾經係民主黨（白鴿黨）黨員嘅佢都想繼續爭取傳統泛民支持者嘅支持，所以補選時文宣印刷品嘅設計原本都想沿用類似白鴿黨用開嘅綠色，點知最終因印刷失誤搞到走晒樣。不過點都好，佢都總算有驚無險當選，可以鬆番口氣喇！
卓妮