政情：下屆財委會主席 陳振英潛在人選

立法會大會現時除咗由主席梁君彥主持外，亦不時由內會主席李慧琼頂替，政圈中人普遍都預期，李慧琼日後有機會接任主席，其時內會主席又要再爭過。至於財委會主席一職，如果陳健波唔做議員，要搵人接任就真係令人相當頭痕。

料陳克勤田北辰接班機會細

曾經有人提議過，由民建聯嘅陳克勤做接班人，但係陳克勤同李慧琼係黨友，如果李慧琼做大會主席，陳克勤又做財委會主席，兩個重要嘅職位來自同一個黨，相信都會引起不滿。另一個可能嘅人選係財委會副主席嘅田北辰，但係佢離開新民黨後，喺立法會孤家寡人，實在令人質疑係咪有得「分餅仔」做財會主席，加上佢不時有啲反對政府嘅意見，唔係咁跟隊形下，真係未必畀到個財委會主席佢做，即使佢依家係副主席，陳健波都坐足喺財委會，鮮有見到田北辰主持會議。至於自由黨方面，張宇人亦曾擔任過財會主席，但佢已經做過財會主席嘞，相信再做嘅機會較細，到底會唔會有興趣做內會主席，反而令人關注。

表現淡定 開會勤力似返全職

政圈近日就傳出，陳振英係財會主席嘅潛在人選，指陳振英開會相當勤力，成日都全職留喺立法會，好似返一份新工作咁，唔似得有啲議員影都唔見，加上做咗議員一年多，已經愈來愈熟練，講嘢都有紋有路，佢嘅上一手吳亮星都做過財會主席，表現就比較慌張，而陳振英份人就淡定得多，如果出任財會主席，又可以令到「散人」呢個板塊喺立法會有個重要代表，陳振英隨時係下屆接任財會主席嘅潛在人選呀！