中環出更：創造生物經濟 蔡少偉倡建兩岸四地平台
早前兩岸四地一班生物科技專家同企業家聚首一堂，探討生物醫藥創新合作嘅模式。香港生物醫藥創新協會（協會）會長盧毓琳、常務副會長蔡少偉（William）都有到場，William話現時兩岸四地之中，以台灣嘅生物科技實力最領先，但當地市場細，大陸就有市場，香港則有集資優勢，所以若建立一個兩岸四地合作平台，將可帶動成個行業嘅發展，盧毓琳就笑稱係創造「生物經濟」喎。
來自內地嘅中國醫藥創新促進會執行會長宋瑞霖、來自台灣嘅生物科技界泰斗同埋「鈕扣大王」陳偉崇（David）都在場，聽到William咁講，佢哋會唔會考慮吓呢？
其實William同David都係近年先轉型投資生物科技，David成功研發出澱粉膠囊以取代動物明膠，年底就可以推出，但設廠都係要去江蘇，因為香港地少又貴，David話決定北上設廠前曾經同港府商討，但係對方反應好冷淡，惟有算數。而William就爆料話，最近旗下研發團隊研究出只需吹氣即可檢測癌症，相信推出市面後將造福更多人群。
周博裕笑稱投資十鋪輸七鋪
投資生物科技係咪咁易賺錢？協會常務副會長周博裕就笑稱，自己近十年喺生物醫藥方面交咗好多學費，形容呢啲投資十鋪輸七鋪係好常見，喺美國研發一隻新藥郁啲就要花費一百億港元，但又唔保證一定成功，換咗係香港人，有錢都寧願去炒賣房地產喇！香港生物科技研究院院長鄭漢其聽完笑稱，輸七鋪算好叻喇，因為只要贏一鋪就發達。投資風險雖然大，但周博裕話希望推動企業多啲投資。
卓妮