政情：賴嘉汶密密落區 自嘲曬到變炭

免疫力降兼爆瘡

目前服務屯門區嘅Apple話自十月起區內有新屋邨進行預配，所以佢需要經常落區，睇吓有乜嘢可以幫到手，結果就曬到變咗舊炭。不過轉個角度嚟講，佢嘅膚色就明顯比以前健康咗，所以唔使太介意。

但最大問題係塊面爆瘡，佢話本身皮膚一向唔太好，再加上免疫力降低，搞到出現埋皮膚敏感，情況咪更差囉。雖然佢明白病向淺中醫嘅道理，但就因為藥物含類固醇而唔太敢用喎，好彩目前情況都有所改善啫！

仲記得曾經有人講過，青民中同Apple有關嘅貼文瀏覽量最多，雖然佢要由零開始去服務新屋邨會比較吃力，但都要照顧好個樣，繼續幫青民呃Like先得喎。