理得你性感定全裸，掛牆定座枱，年曆根本冇存在價值，送畀人仲嫌你老土，難怪過往一年一會裸女爭崩頭鬥快出年曆掠水畫面，家陣已經唔見有啦！問題係市場仲有一批死硬派枱頭總要有個索女年曆睇吓先有存在感，如果你認為呢啲先叫品味，冇問題！即刻精選幾個2018年最養眼年曆畀大家醒吓神喇！
叫人「村姑」其實係侮辱咗呢班囡囡，細佬修正一下 ，正確係德國女農先啱！據德國巴伐利亞青年農業協會網站表示，女農年曆早喺2006年已經推出，原因係想話畀全球知，務農界並非如外界所想咁差，佢哋一樣有天使面孔同魔鬼身材，個個索到爆，而每個月份上嘅主題寫真都係以當地嘅鄉村作背景，加上囡囡嘅大膽演出，難怪每年推出嘅年曆都賣斷市！一拍十幾年，嚟到2018年年曆繼續玩不經意露出，而農業協會會長Richard Goetz更表示年曆正要表現出日常與現代嘅農業生活。嘩！如果堅係有咁索嘅女農，我都唔介意一世耕田呀！
售價：約HK$260
近年全球興起「共享單車」，但單車多過人，可能你都會諗究竟條路係泊單車定畀人行呢？假如呢班借共享為名，商業為實嘅單車公司唔想令人討厭，宣傳手法就要參考吓呢個名為「The Sexy Cycling Calendar 2018」年曆喇！理由唔使我解釋，相信天下間冇男人會討厭性感索女踩單車任人（目及），咁當然年曆並非「物化女性」咁膚淺，查實佢喺2014年開始印製，至今已經係第5年發行，報稱由旅居德國嘅瑞士籍業餘女單車手Kristin Atzeni發起，喺多個單車網站發售，年年賣斷市，今年更獲得多個單車品牌贊助，每架單車都萬萬聲呀！至於點解用性感索女做年曆主題佢哋就冇解釋，或者係想吸引更多女士踩單車啩！
售價：約HK$237
話釣魚係麻甩佬先玩嘅活動一定得罪好多人，但唔只細佬咁講，推出性感釣魚年曆嘅設計師Hendrik Pöhler早就咁認定啦！類似嘅釣魚年曆歐美有好多，以呢個牌頭最起朵，或者係囡囡夠索，啲魚夠肥啩！而設計師早喺2010年已大量印製釣魚年曆，針對嘅對象當然係男人，目的係要將釣魚視為最性感畫面，而將大魚加辣妹放埋一齊，可能係設計師嘅終極性幻想，但又真係幾吸引！
售價：約HK$177
FCR Fashion Book今年首次推出名叫「CR Girls 2018」潮流年曆，雖然個名唔潮又唔爆，但一樣震撼潮流界，皆因集結如Gigi Hadid、Joan Smalls、Grace Elizabeth、Hailey Clauson、Paris Jackson及Hoyeon Jung等多達13位超模，以健身主題大騷Fit爆波哋，當然唔少得潮流服飾，好似着高踭鞋跑步同舉鐵、着皮衫皮鞋做引體上升等，完全違反傳統運動服飾，但出奇地構圖相當完美，梗係啦！有攝影大師Steven Klein操刀，以及法國時尚雜誌編輯Carine Roitfeld監製，你唔使識佢哋，識欣賞同畀錢就得喇，全數收益將撥捐特殊奧運動會（Special Olympics），做吓善事啦喂！
售價：約HK$1,560
以超現實風格起朵嘅插畫家多到數唔晒，但國際最知名兼且畫得最Sexy嘅必數美國籍Boris Vallejo及Julie Bell呢對夫妻檔組合。1958年出生嘅Julie Bell，咪以為女流之輩畫風必定係純情，早喺80年代推出嘅成人科幻漫畫雜誌《Heavy Metal》，阿姐佢已經有份參與創作，之後更替各大公司製作廣告插圖，Julie Bell亦以藝術家自居，佢認為藝術就如呼吸一樣自然，因此堅持畫不停。至於老公Boris Vallejo喺1964年由秘魯移民美國，背景同Julie Bell差唔多，而佢就堅持古典主義加天馬行空嘅幻想溝埋一齊，難怪佢哋嘅作品任何年齡都Buy啦！大家唔睇佢哋嘅漫畫，都買個由佢哋設計嘅年曆欣賞一下，具收藏價值。
售價：約HK$125
撰文：祖