二○一七年嚟到尾聲，有政黨早前搞咗個「香港年度漢字」評選，結果由四千多票嘅「貴」字當選，可謂大熱勝出啊！事關今年香港樓價繼續屢創新高，水電煤、租金、交通、飲食樣樣加價。樣樣都貴，市民叫苦連天，但政府庫房水浸，估計今個財政年度有千億盈餘，財政司司長陳茂波（波叔）仲有兩個月就發表新一份財政預算案，唔少政黨都撬政府夾萬撥多啲資源去紓解民困，假若波叔堅持做守財奴，唔肯開倉派米嘅話，肯定激起民憤，後果不堪設想。
